ఓ సాహసయాత్రకు సిద్ధం కండి!

లాక్‌ డౌన్, ఐసొలేషన్‌, క్వారంటైన్‌… ఇలాంటి మాటలు వింటే ఎంతో కష్టంగా ఉంటుంది. అనవసరంగా బయట తిరగొద్దు, అత్యవసరం అయితే తప్ప గుంపుని పొగుచేయవద్దు… లాంటి సూచనలు వింటే ఎవరి మీదో తెలియని కోపం వస్తుంది. ఎందుకంటే చాలామంది దృష్టిలో ఇంట్లోనే ఉండాల్సి రావడం అసంభవం. కుటుంబంతో కలిసి ఉన్నా, టీవీ మొబైల్‌  అందుబాటులో ఉన్నా భరించలేని వెలితి. ఎక్కడికో ఎగిరిపోవాలనే ఉక్కపోత. నిజంగా మనిషి నాలుగు గోడల మధ్య ఉండలేడా? ఇదే అనుమానం వచ్చింది కొంతమంది ఫ్రాన్స్‌ పరిశోధకులకి.

ఫ్రాన్స్‌ లోని ‘హ్యూమన్‌ అడాప్షన్‌ ఇన్‌ స్టిట్యూట్‌’ ఓ చిత్రమైన ప్రయోగం చేసింది. ప్రపంచానికి దూరంగా, సమయానికి అతీతంగా ఉంటే మనలో ఎలాంటి మార్పులు వస్తాయో తెలుసుకోవాలనుకుంది. అందుకోసం ఓ 15 మందిని వెలుతురే రాని ఓ గుహలోకి పంపింది. అక్కడ టీవీలు, ఫోన్లతో సహా ఎలాంటి సాంకేతిక పరికరాలూ లేవు. వెలుతురు రావాలంటే మన పెద్దలు వాడినట్టు… ఓ సైకిల్‌ కి తగిలించిన డైనమోని తిప్పాల్సిందే, నీళ్లు కావాలంటే 150 అడుగుల లోతు ఉన్న బావి నుంచి తోడుకోవాల్సిందే! ఈ ప్రాజెక్టుకి డీప్‌ టైమ్‌ ప్రాజెక్ట్‌ అని పేరు పెట్టారు.

ఊహించనట్టుగానే కొన్నాళ్లకి ఆ గుహలో ఉన్నవారికి సమయం గురించి సోయ పోయింది. వాళ్ల శరీరాలే గడియారాలుగా మారిపోయాయి. అది సూచించిన సమయానికి తగినంత నిద్రపోవడం, అది గంట కొట్టినప్పుడు ఆహారం తీసుకోవడం. ఇంతకుమించి మరి ఎలాంటి విచిత్రమూ జరగలేదు. గడువు పూర్తయిన తర్వాత వాళ్లందరినీ బయట ప్రపంచానికి తీసుకువచ్చారు. ఆశ్చర్యంగా… వాళ్లు నవ్వుతూ సంతోషంగా బయటకి వచ్చారు. కాకపోతే సూర్యకాంతిని భరించడానికి కాసేపు నల్లకళ్లద్దాలు కావల్సి వచ్చాయి అంతే! వాళ్లలో చాలామంది ‘అప్పుడే 40 రోజులూ పూర్తి అయిపోయాయా’ అని ఆశ్చర్యపోయారు. పదిమందికి పైగా ఆ గుహలో ఇంకొన్నాళ్లు ఉండాలని ఉందని చెప్పారు.

మనలో ప్రతి ఒక్కరూ కూడా ఇప్పుడు అలాంటి ప్రాజెక్ట్‌ లోనే ఉన్నారు. అదృష్టవశాత్తు మన కుటుంబసభ్యలు మనతోనే ఉన్నారు, మనకి ఇష్టమైన సినిమాలు, నచ్చిన గాడ్జట్స్‌ అన్నీ అందుబాటులో ఉన్నాయి. మరీ బోర్‌ కొడితే నాలుగడుగులు వేసే అవకాశమూ ఉంది. పైగా మన ప్రాజెక్టుకి ఓ లక్ష్యం కూడా ఉంది… అది మనల్నీ, చుట్టుపక్కల వారినీ ఓ మహమ్మారి నుంచి రక్షించుకోవడమే! ఇంత గొప్ప సాహసాన్ని ఎలా దూరం చేసుకోగలం.

#covid2019 #isolation #socialdistancing #talradio #touchalife #talstories #talfb

సంతోషం కావాలా… ఇకిగాయ్‌ ప్రయత్నించండి!

ఆ రోజు ఉదయం సన్నీ హడావుడి చూడాల్సిందే! ఇంట్లో అందరికంటే ముందే నిద్రలేచాడు. ఎవరూ వెంటపడకుండానే చకచకా తయారైపోయాడు. ఆ సందడికి కారణం! ఇవాళ వాళ్ల బాబాయ్‌ వస్తున్నాడు. వస్తూవస్తూ సన్నీకి ఇష్టమైన గిటార్‌ తీసుకువస్తానని మాట ఇచ్చాడు. గిటార్ అంటే తనకి ప్రాణం. ఇవాళ తను సంతోషంగా ఉండటానికి, దాన్ని అందుకున్నాక ప్రపంచాన్ని జయించినంత తృప్తిని అనుభవించడానికి అదే కారణం. ఒక్కమాటలో చెప్పాలంటే సన్నీ ‘ఇకిగాయ్‌’ ఆ గిటార్‌.

మనిషి ఎందుకు పుడతాడు? పునర్జన్మ ఉందా! లాంటి పెద్దపెద్ద ప్రశ్నలకు మనం సరైన జవాబులు ఇవ్వలేకపోవచ్చు. కానీ జీవితానికి సార్థకత ఏమిటి అంటే మాత్రం తృప్తిగా, సంతోషంగా ఉండగలగడమే అని ఎవరైనా చెప్పేస్తారు. కానీ అది సాధ్యమా అంటే సాధ్యమే అంటుంది ఇకిగాయ్‌ సూత్రం. జపాన్‌లో దాదాపు వెయ్యేళ్ల క్రితమే ఈ సిద్ధాంతాన్ని కనిపెట్టారు. మిగతా ప్రపంచంతో పోలిస్తే అక్కడి ప్రజలు ఎక్కువకాలం జీవించడానికి కారణం మంచి ఆహారపు అలవాట్లతో పాటుగా ఇకిగాయ్‌ ను అనుసరించడమే అని చెబుతారు. ఇంతకీ ఏమిటీ ఇకిగాయ్‌!

మనకి ఏ పని అంటే ఇష్టం, ఏ పని చేయగలం, ప్రపంచానికి ఎలాంటి పనులు అవసరం, వాటిలో వేటికి తగినంత ప్రతిఫలం వస్తుంది…. ఈ నాలుగు లక్షణాలను కలిపేదే మన ఇకిగాయ్‌. కానీ మన రోజువారీ జీవితంలో ఈ నాలుగు లక్షణాల మధ్యా వైరుధ్యం కనిపిస్తుంది కాబట్టే… ఎంత సాధించినా, సంపాదించినా ఏదో అసంతృప్తి! నలుగురితో మాట్లాడటం అంటే ఆసక్తి ఉండేవారు మార్కెటింగ్‌ లో ఉంటే వృత్తిని ఎంజాయ్‌ చేయగలరు. అదే కేవలం డబ్బు కోసమే తన వ్యక్తిత్వానికి విరుద్ధమైన రంగంలోకి దిగితే అనుక్షణం నరకంగా ఉంటుంది! కాబట్టి లక్ష్యాన్ని కాకుండా ప్రయాణాన్నే దృష్టిలో పెట్టుకుని తగిన రంగాన్ని ఎంచుకోమంటుంది ఇకిగాయ్‌. అలా చేస్తే వంట చేయడం నుంచి అంతరిక్షాన్ని చేరుకోవడం వరకు ఏ రంగంలో అయినా అడుగుపెట్టవచ్చనీ, అనుక్షణం హాయిగా ఉండొచ్చని చెబుతుంది.

ఇకిగాయ్ ని ఒక్క కెరీర్‌ లో మాత్రమే కాదు. సామాజికంగా, కుటుంబపరంగా కూడా వెతుక్కోమంటారు. ఉదాహరణకు భార్య సంతోషిస్తుందని ఏదో బహుమతి ఇచ్చేబదులు, తన చిన్నపాటి కోరికలు తీర్చడం ద్వారా సంతోషాన్నే బహుమతిగా ఇవ్వొచ్చు కదా! ఆలోచించాలే కానీ ఇకిగాయ్‌ తో మన జీవితాల్లోకి ఇలాంటి మార్పులెన్నో తీసుకురావచ్చు.

#ikigai #japan #ఇకిగాయ్‌ #talradio #talfb #touchalife

పుస్తకంతో ఇంత ఆరోగ్యమా!

ఇవాళ పుస్తక దినోత్సవం. ఈ మాట వినగానే మనకి ఎన్నో కొటేషన్స్‌ గుర్తుకువచ్చేస్తాయి. పుస్తకాల సాయంతో ప్రపంచాన్నీ, జీవితాన్నీ ఎలా గెలవచ్చో గుర్తుచేస్తాయి. నిజమే! కానీ పుస్తకం చదివిన వెంటనే మనలో ఎలాంటి మార్పు వస్తుంది. మన ఆరోగ్యం మీదా, అనుబంధాల మీద దాని ప్రభావం ఏంటి? ఈ సందేహమే వచ్చింది మాకు. దాంతో కొన్ని పరిశోధనలు గమనించాం. ఫలితాలు ఇవిగో…

– 2013లో చేసిన కొంతమంది శాస్త్రవేత్తలు పుస్తకం చదివేటప్పుడు మెదడులో జరిగే చర్యలను గమనించే ప్రయత్నం చేశారు. ఇందుకోసం వాళ్లు కొందరు అభ్యర్థులకు ‘పాంపే’ అన్న నవలని ఇచ్చి, తొమ్మిదిరోజుల పాటు చదవమన్నారు. అది చదివే సమయంలో వాళ్ల మెదడుని MRI స్కాన్‌ చేశారు. ఆశ్చర్యంగా పుస్తకంలో నిమగ్నం అయినప్పుడు, మెదడులో వేర్వేరు వ్యవస్థల మధ్య సమన్వయం పెరిగిందట.

– రష్‌ విశ్వవిద్యాలయంలో జరిగిన ఓ పరిశోధనలో… పుస్తకాలు చదివే అలవాటు ఉన్నవారి మెదడు వృద్ధాప్యంలో కూడా చురుగ్గా పనిచేస్తుంది, డిమెన్షియా (మతిమరపు) లాంటి సమస్యలు త్వరగా రానివ్వదు అని గమనించారు.

– 2009లో జరిగిన ఓ రీసెర్చ్‌ లో 30 నిమిషాల పాటు పుస్తకం చదివితే రక్తపోటు తగ్గుతుందనీ, గుండె పనితీరు మెరుగుపడుతుందనీ తేలింది. యోగా చేయడం, నవ్వడం లాంటి పనులతో ఎంత ఫలితం ఉంటుందో, పుస్తకాలు చదవడం వల్ల అంతే సానుకూల ఫలితం ఉంటుందని ఈ నివేదిక తేల్చింది.

– పిల్లలకు పుస్తకాలు చదివి వినిపించడం, లేదా వాళ్లతో కలిసి చదవడం వల్ల… ఇద్దరి మధ్యా బంధం బలపడుతుందని క్లీవ్‌ లాండ్‌ వైద్యులు సూచిస్తున్నారు. దీని వల్ల పెద్దలకీ ఓ కాలక్షేపం అవుతుందనీ… పిల్లలలో భాష, కమ్యూనికేషన్‌ స్కిల్స్‌ బలపడతాయని చెబుతున్నారు.

– సాహిత్యం చదివేటప్పుడు రకరకాల పాత్రలు, స్వభావాలు కనిపిస్తాయి. మానవ జీవితం మీద ఓ ఆకళింపు తీసుకువస్తాయి. అందుకేనేమో పుస్తకాలు చదివేవారు… ఇతరుల భావాలనీ, అభిప్రాయాలనీ త్వరగా గుర్తించగలరనీ వారి బాధలను గుర్తించగలరనీ మరో పరిశోధన నిరూపించింది.

బహుశా ఇన్ని రకాల కారణాల వల్లనేమో… పుస్తకాలు చదివే అలవాటు ఉన్నవారు ఇతరుల కంటే ఎక్కువకాలం జీవించే అవకాశం 23 శాతం ఎక్కువగా ఉన్నట్టు గమనించారు. మూడువేల మందికి పైగా జీవితాలను పరిశీలించిన తర్వాతే, ఈ నిర్ణయానికి వచ్చారు.

పుస్తకాల వల్ల మనకు నేరుగా ఎంత లాభం ఉంటుందో చెప్పే పరిశోధనలివి. ముందుగా అనుకున్నట్టు, అవి మన విజయాల మీదా, ఎదుగుదల మీద ఎంత ప్రభావం చూపిస్తాయో ఎలాగూ తెలిసిందే. పుస్తకప్రియులందరికీ ప్రపంచ పుస్తక దినోత్సవం శుభాకాంక్షలతో పాటుగా ఇలాగే కలకాల హాయిగా పుస్తకాలు చదువుతూ గడపాలని కోరుకుంటూ…. టాల్‌ రేడియో!

#worldbookday #worldbookday2021 #talfb #talradio #touchalife

సేవ చేస్తే తిరిగి ఎన్ని లాభాలో!

సాటి మనిషి కోసం చేయి అందించే సేవకులను గుర్తించేందుకు ఏప్రిల్‌ 20ని Volunteer Recognition Day గా గుర్తిస్తున్నారు. ఈ సందర్భంగా కొన్ని కబుర్లు…

ఈ లోకంలో ఎంత గొప్ప మనిషైనా ఒంటరిగా జీవించలేడు. డబ్బుతోనో, పలుకుబడితోనో అనుకున్న ప్రతిదీ సాధించలేడు. కొవిడ్‌ అందుకు స్పష్టమైన నిదర్శనం. మనం చేసే సాయంతో, ఇతరుల జీవితాలు ఎలాగూ బాగుపడతాయి. స్వచ్ఛంద సేవ చేసేవారికి కూడా దాని వల్ల ఎన్నో లాభాలు ఉన్నాయంటున్నారు శాస్త్రవేత్తలు.

– తను చేస్తున్న పని ఒకరికి లాభం కలిగిస్తోందనే భావన తృప్తినీ, ఆత్మవిశ్వాసాన్నీ కలిగిస్తాయట.

– సేవలో భాగంగా కొత్తకొత్త వ్యక్తులు కలుస్తారు. బంధాలు బలపడతాయి, అవి అనుబంధాలుగానూ మారతాయి. సేవకు ప్రతిఫలంగా మనసులని గెలుచుకుంటున్నట్టే!

– సేవ చేసేటప్పుడు నలుగురినీ కలుపుకుపోయే తత్వం అలవడుతుంది. సమిష్టిగా పనిచేసే team spirit అలవడుతుంది.

– రకరకాల సమస్యలని పరిష్కరించే ప్రయత్నంలో… ఏ పరిస్థితుల్లోనైనా నిర్ణయాలు తీసుకునే స్వభావం, నిబ్బరంగా ఉండే తత్వం అలవాటు అవుతాయి.

– సేవ అంటేనే అడుగు ముందుకు వేయడం, ఎవరూ ముందుకు రాకపోతే ఒంటరిగానే పనిచేయడం, ఎవరన్నా కలిసివస్తే వాళ్లతో కలిసి పనిచేయడం. నాయకత్వ లక్షణాలు పెరగడానికి ఇంతకంటే మంచి అవకాశం మరేం ఉంటుంది.

– స్వచ్ఛంద సేవ అంటే ఏదో ఒక పనిలో నిమగ్నమైపోవడమే. దాని వల్ల మనసులో క్రుంగుబాటు లాంటి భావనలకు సమయం ఉండదు. పనిలో శరీరం కూడా దృఢంగా ఉంటుంది.

సేవ చేయాలనుకునేవారు ఈ లాభాలన్నీ చూసుకుని బేరీజు వేసుకుని సాయపడరు. అది వారి తత్వం అంతే! అలాంటివారిని గుర్తించి, గౌరవించడం మన బాధ్యత. ఇవాల్టి రోజున మనకు తెలిసిన అలాంటి వ్యక్తి ఎవరన్నా ఉంటే, వారిని ఓసారి పలకరించే ప్రయత్నం చేద్దాం. స్వచ్ఛంద సేవ వల్ల పిల్లల వ్యక్తిత్వంలో ఎన్నో సానుకూలమైన మార్పులు వస్తాయి. అందుకనే టచ్‌ ఏ లైఫ్‌ కూడా ‘టాల్‌ స్కౌట్స్‌’ పేరుతో ఒక వినూత్నమైన కార్యక్రమాన్ని రూపొందిస్తోంది. మరిన్న వివరాల కోసం https://www.touchalife.org/talscout/ క్లిక్‌ చేయండి.

#volunteerrecognition #talradio #talfb #touchalife #talgiving

అగాథం నుంచి ఆకాశం వరకు… కె.ఎల్‌. రాహుల్‌ జీవితం

మనిషన్నాక తప్పు చేయడం సహజం. కానీ ఆ తప్పుని సరిదిద్దుకోగల సత్తా కూడా మనిషికే సొంతమైన వరం. దాన్ని ఉపయోగించుకుంటే, కెరటంలాగా పడిలేస్తాం. లేకపోతే కోటిమందిలో ఒకరిగా మిగిలిపోతాం!

2019 జనవరి. కొత్త సంవత్సరం… కొత్త ఆశలు. క్రికెట్‌ అభిమానులకైతే చెప్పలేనంత సంతోషంగా ఉంది. కారణం. ఆస్ట్రేలియన్ జట్టును వారి గడ్డమీదే ఓడించేశారు. టెస్ట్‌ సిరీస్‌ గెలుచుకుని వన్డే సిరీస్ కూడా గెలుచుకోవడానికి సిద్ధంగా ఉన్నారు. ఆ జట్టులో భాగమైన కె.ఎల్‌.రాహుల్‌ కూడా హ్యాపీనే! ఇప్పుడిప్పుడే తన కెరీర్‌ నిలదొక్కుకుంటోంది. తన బ్యాటింగ్‌ లో చిన్నచిన్న లోపాలు బయటపడుతున్నా, జట్టులో స్థానం మాత్రం పదిలంగానే ఉంది. అలాంటి సమయంలో ఓ రోజు…

అది ‘కాఫీ విత్‌ కరణ్‌’ టీవీ ప్రోగ్రామ్‌. అందులో అతిథులుగా హార్థిక్‌ పాండ్యా, కె.ఎల్‌.రాహుల్‌ వెళ్లారు. అంత పెద్ద కార్యక్రమానికి వెళ్లాం అన్న సంతోషమో, తెలిసీతెలియని కుర్రతనమో, విజయంతో పాటు వచ్చిన పొగరో… కారణం ఏదైతేనేం! ఆ కార్యక్రమంలో నోటికి వచ్చినట్టు మాట్లాడారు. అంతే! సోషల్‌ మీడియా భగ్గుమంది. ఆకాశానికెత్తిన అభిమానులే ఛీకొట్టారు. ఆస్ట్రేలియా పర్యటలో ఉన్న వారిద్దరినీ అర్ధంతరంగా ఇంటికి పంపేశారు. ఓ ఆటగాడికి అంతకంటే అవమానం ఏముంటుంది?

నిరాశతో, అవమానంతో ఇంటికి తిరిగి వచ్చాడు రాహుల్‌. ఇక తనకి జట్టు నుంచి పిలుపు రాకపోవచ్చు. తన బ్యాటింగ్‌ లోపాల గురించి కూడా జనం మాట్లాడటం మొదలుపెట్టారు. తను పనికిరాడని తేల్చేశారు. మరేం చేయడం! రెండే రెండు మార్గాలు కనిపించాయి. సంపాదించినదంతా బ్యాంకులో వేసుకుని, ఓ ఉద్యోగంలో చేరిపోవడం లేదా తన పరిపూర్ణమైన క్రికెటర్‌ గా ఎదగడం. రెండో మార్గాన్నే ఎంచుకున్నాడు. తన మీద ఇంకా నమ్మకం ఉన్న చిన్ననాటి స్నేహితులను కలుసుకున్నాడు. వాళ్లతో కలిసి ప్రాక్టీస్‌ మొదలుపెట్టాడు. నిర్మొహమాటంగా తన మిత్రుల సలహాలను పాటించాడు. తన పాత వీడియోలను పదేపదే చూసుకుంటూ లోపాలను సరిదిద్దుకున్నాడు.

రాహుల్‌ పట్టుదల గమనించిన జట్టు, తనకి మళ్లీ అవకాశం ఇచ్చింది. ఈసారి దాన్ని రెండుచేతులా అందిపుచ్చుకున్నాడు. వికెట్‌ కీపర్‌ గా కూడా ప్రయత్నించి, జట్టుకి తన అవసరం ఉండితీరేలా చూసుకున్నాడు. అదే ఊపుతో ఐపీఎల్‌ లో పంజాబ్ జట్టుకి నాయకుడిలా మారాడు. గత ఏడాది ఐపీఎల్‌ జట్లలో ఎక్కువ పరుగులు చేసిన కెప్టెన్‌ గా నిలిచాడు. ఈసారి ఐపీఎల్‌ లోనూ తన సత్తా చాటుకుంటున్నాడు.

ఇంతకీ కె.ఎల్‌. రాహుల్‌ కమ్‌ బ్యాక్‌ వెనుక ఉన్న స్ఫూర్తి ఏంటి? అంటే దానికి మనం ఎప్పటికీ మర్చిపోలేని ఓ జవాబు చెబుతాడు. ‘మనం పరాజయాల మధ్య ఉన్నప్పుడు… ఎవరో ఒకరు మనకి ప్రేరణగా నిలుస్తారనీ, నిరాశలో భుజం తడుతూ ప్రోత్సహిస్తారనీ ఆశగా ఎదురుచూస్తాం. కానీ మన విధికి మనమే బాధ్యులం అన్న విషయాన్ని గుర్తిస్తే… లేచి నిలబడగం, విజయం దిశగా అడుగులు వేయగలం’ అంటాడు. నిజమే కదా!

#ipl2021 #klrahul #talradio #talfb #ipl

పడి లేచిన ఆ క్రికెటర్‌ కథ… ప్రతి ఒక్కరికీ స్ఫూర్తి కాదా!

జీవితం ఓ వైకుంఠపాళి. ఇక్కడ కూడా అవకాశాలు అనే నిచ్చెనలు ఉంటాయి. లోపాలనే సర్పాలు దిగమింగేందుకు సిద్ధంగా ఉంటాయి. కాకపోతే ఒక్కటే తేడా! పాచికలు ఎప్పుడు వేయాలో, ఎంత వేయాలో నిర్ణయించుకునే శక్తి మనకి ఉంటుంది. దానికి ఉదాహరణే ఐపీఎల్‌ లో దుమ్ము రేపుతున్న పృథ్వీ షా కథ!

పృథ్వీషా.. టీనేజ్ నుంచే క్రికెట్‌ రికార్డులు బద్దలుకొట్టిన ప్రతిభావంతుడు. రంజీ ట్రోఫీ, దిలీప్‌ ట్రోఫీల్లో ఆడిన మొదటి మ్యాచ్‌ లోనే సెంచరీ చేసిన యోధుడు. అంతకుముందు సచిన్‌ ఒక్కడే ఆ రికార్డును సాధించాడు. ఇలాంటి రికార్డులే అతన్ని అండర్‌-19 జట్టుకు నాయకుడి హోదాను అందించాయి. దేశం తనపై ఉంచిన నమ్మకాన్ని వమ్ము చేయలేదు పృథ్వీ. 2018లో ఆస్ట్రేలియాలాంటి మేటి జట్టుతో తలపడి, ప్రపంచ కప్‌ ను అందించాడు.

పృథ్వీని చూసి మరో టెండుల్కర్‌ దొరికిపోయాడని మురిసిపోయారంతా. 18 ఏళ్లకే టెస్టు జట్టులో చోటు దక్కింది. ఆడిన మొదటి మ్యాచ్‌ లోనే సెంచరీ సాధించి మరోసారి సచిన్‌ రికార్డును సమం చేశాడు. ఇక పృథ్వీకి తిరుగులేదు, ఆకాశమే హద్దు అనుకున్నారంతా. అక్కడి నుంచి అసలు కథ మొదలైంది. అతి విశ్వాసమో, అనుభవ రాహిత్యమో… కారణం ఏదైతేనేం, వరుస వైఫల్యాలు ఎదురయ్యాయి. క్రీజ్‌ లోకి అలా వచ్చి ఇలా వెళ్లిపోయేవాడు. పొగిడిన నోళ్లే, విమర్శలు గుప్పించాయి. ఆఖరికి గత ఏడాది ఐపీఎల్‌ లో సైతం దారుణంగా విఫలమయ్యాడు. 18 పరుగుల సగటు చూసి, సగం టోర్నమెంట్‌ తర్వాత తనని పక్కన పెట్టేశారు.

ఇలాంటి సమయంలో మాజీ క్రికెటర్ ప్రవీణ్‌ ఆమ్రే తనని గమనించాడు. పృథ్వీ ఆటలో లోటు ఎక్కడ ఉందో సూచించాడు. ‘నిన్ను నువ్వు సరిదిద్దుకోకపోతే, దేవుడు కూడా కాపాడలేడని’ హెచ్చరించాడు. అద్దం ముందు నిలబెట్టి ‘ఇందులో కనిపించే ఆటగాడి స్థాయిలో నువ్వు ఆడటం లేదు’ అని గుర్తుచేశాడు. ఆత్మవిమర్శకు మించిన ఆయుధం ఉండదు. అదే ఉపయోగించాడు పృథ్వీ. తన ఆటతీరును మెరుగుపరుచుకున్నాడు. ఈ ఏడాది విజయ్‌ హజారే ట్రోఫీలో పాల్గొని 800 పరుగులు చేసి మళ్లీ రికార్డులు రాయడం మొదలుపెట్టాడు. ఈసారి ఐపీఎల్‌ లో దిల్లీ కేపిటల్స్‌ తరఫున మొదటి మ్యాచ్‌ లోనే 72 పరుగులు చేసి జట్టును గెలిపించాడు. ఇప్పుడు మళ్లీ ప్రశంసలు మొదలయ్యాయి! అయినా పృథ్వీకి ఇప్పుడు వాటితో పనిలేదు. తను ఏం సాధించగలడో ఇప్పుడు తనకి తెలుసు.

#ipl2021 #ipl #prithvishaw #talradio #talpost #delhicapitals

ఏడు వేల కుటుంబాలను ఏకం చేసిన డాక్టర్‌!

(Photo by TED ALJIBE / AFP) (Photo credit should read TED ALJIBE/AFP/Getty Images)

అది ఓ ట్రాఫిక్‌ సిగ్నల్‌. ఎవరికి వాళ్లు బతుకుపరుగులో బిజీగా ఉన్నారు. వాళ్లలో ఎవరి చూపూ… రోడ్డు పక్కనే ఉన్న అనామకుడి మీద పడటం లేదు. చిరిగిన బట్టలతో, తనలో తను మాట్లాడుకుంటున్న అతన్ని ఎవరూ సాటి మనిషిగా గుర్తించడమే లేదు. ఒకవేళ ఎవరన్నా తన వంక చూసినా, అతను అక్కడ ఎందుకు ఉన్నాడు, తన పరిస్థితి ఏమిటి అని ఆలోచించే ఓపిక లేదు. కానీ అటుగా వెళ్తున్న ఓ డాక్టర్‌ మాత్రం, అతన్ని తన కారులో ఎక్కించుకున్నాడు. అక్కడి నుంచి అనామకుడి కథ మారిపోబోతోంది.

భరత్‌ వాత్వానీ చాలా కష్టాలను దాటుకుని పైకి వచ్చాడు. చిన్నప్పుడే తండ్రి చనిపోయినా, అంచెలంచెలుగా ఎదుగుతూ… తన కాళ్ల మీద తను నిలబడి సైకాలజీగా డాక్టర్‌ అయ్యాడు. తన తోటి విద్యార్థి స్మితను ప్రేమించి పెళ్లిచేసుకున్నాడు. వైద్య వృత్తి మాత్రమే వాళ్లని కలపలేదు. కష్టంలో ఉన్న మనిషికి సాయపడాలనే లక్షణమే ఇద్దరినీ ఒకటి చేసింది.

అది 1988 సంవత్సరం. భరత్‌, స్మితలు పెళ్లి చేసుకుని ఏడాది గడుస్తోంది. ఇద్దరూ కలిసి అప్పుడే ఓ క్లినిక్‌ ప్రారంభించారు. అలాంటి సంతోషకరమైన సందర్భాలను సెలబ్రేట్‌ చేసుకునేందుకు ఓ రెస్టారెంట్‌‌ కి బయల్దేరారు. దారిలో ఓ యువకుడు… పక్కనే ఉన్న డ్రైనేజి లోంచి నీళ్లు ముంచుకుని తాగుతూ వాళ్లకి కనిపించాడు. అతని వాలకం చూసిన ఆ ఇద్దరికీ అతనో మానసిక రోగి అని అర్థమైపోయింది. క్షణం ఆలోచించలేదు. వెంటనే అతన్ని తీసుకుని వాళ్ల క్లినిక్‌ కు చేరుకున్నారు. ఆ క్లినిక్‌ లో తొలి రోగి అతనే!

కొద్ది రోజులు చికిత్స అందించగానే ఆ రోగి కోలుకున్నాడు. తను చెప్పినదాన్ని బట్టి… తను మంచి చదువు చదువుకున్నాడనీ… ఉద్యోగం కోసం ముంబైకి వచ్చి, ఏ అవకాశం దొరక్కపోవడంతో డిప్రెషన్‌ లోకి జారిపోయి మానసిక రోగిగా మారాడనీ తెలిసింది. అతను కోలుకోవడంతో తన కుటుంబం వివరాలు తెలుసుకుని, వాళ్ల దగ్గరకి చేర్చారు భరత్‌ దంపతులు. ఈ అనుభవం వాళ్లలో కొత్త ఆలోచన రేకెత్తించింది.

మన దేశంలో కొన్ని లక్షల మంది తమకంటూ సరైనా ఆచూకీ లేకుండా తిరుగుతున్నారు. వాళ్లలో సగానికి పైగా, మానసిక సమస్యల వల్ల తమ ఇంటిని మర్చిపోయినవాళ్లే. అలాంటివాళ్లందరినీ అక్కున చేర్చుకుని, చికిత్స అందించి, తమ వివరాలు గుర్తుకు తెచ్చుకునేలా చేసి… వాళ్ల కుటుంబంతో కలపాలన్నది లక్ష్యంగా పెట్టుకున్నారు ఈ దంపతులు. అందుకోసం ‘శ్రద్ధ రీహాబిలిటేషన్‌ ఫౌండేషన్‌’ ను ఏర్పాటు చేసి, ఇప్పటివరకూ ఏడువేల మందికి పైగా మానసిక రోగులను వాళ్ల కుటుంబాలతో కలిపారు.

‘స్నేహితుడి కోసం వెతికితే… ఎవరూ కనిపించలేదు. కానీ స్నేహితుడిగా మారాలనుకుంటే ఎంతోమంది ఆత్మీయులు కనిపించారు’ అని ఓ మాట ఉంది. సాయానికి కూడా ఇదే వర్తిస్తుందేమో కదా! ఎవరన్నా సాయం కోసం మన దగ్గరికి వస్తారేమో అని ఎదురుచూస్తూ ఉంటే, ఎవరూ రాకపోవచ్చు. కానీ మనసుని కాస్త విశాలం చేసుకుని, మనమే సాయం చేయడానికి అడుగు ముందుకు వేస్తే… ఈ ప్రపంచంలో అడుగడుగునా మన చేయూత కోసం ఎదురుచూసే ఎన్నో జీవితాలు కనిపిస్తాయి.

#talradio #talstories #talposts #worldhealthday #worldhealthday2021

చరిత్ర సృష్టించిన వకీల్‌ సాహిబా

ఇప్పటికీ మహిళల పట్ల కొంత వివక్ష ఉన్నమాట నిజమే. కానీ చాలా సందర్భాలలో వాళ్లు కోరింది చదువుకోగలుగుతున్నారు, నచ్చిన ఉద్యోగం చేయగలుగుతున్నారు, పక్షపాతం కనిపించినప్పుడు గొంతు విప్పుతున్నారు. ఓ వందేళ్ల క్రితం ఇలా ఉండేది కాదు కదా! చదువు, ఉద్యోగాల సంగతి దేవుడెరుగు… కనీసం సాటి మనిషిగా కూడా గుర్తించేవారు కాదు. అసలు స్వాతంత్రం రావడమే గొప్ప అనుకున్న అప్పటి కాలంలో, మహిళల సమస్యల గురించి పోరాడే సమయం ఎవరికీ లేదు. అలాంటి రోజుల్లో ఓ మహిళ సాటివారి హక్కుల కోసం నడుం బిగించింది. చరిత్ర సృష్టించింది.

మిథన్‌ లామ్ 1898 లో పుట్టారు. తన తల్లిదండ్రులు ఇద్దరూ కూడా చాలా అభ్యుదయంగా ఉండేవారు. ఆ ప్రభావం మిథన్‌ ఆలోచనలు, వ్యక్తిత్వం మీద స్పష్టంగా ఉండేది. అప్పట్లో మహిళలకి ఓటు హక్కు కూడా ఉండేది కాదు. ఈ సమస్యతోనే తమ పోరాటాన్ని మొదలుపెట్టాలనుకున్నారు మిథన్‌. అప్పట్లో మన దేశ పాలన అంతా బ్రిటన్‌ నుంచే సాగేది. దాంతో లండన్‌కు వెళ్లి మరీ, అక్కడి ప్రభుత్వ పెద్దల ముందు తమ వాదనలు వినిపించారు. ఆ తల్లీకూతుళ్ల పోరాట ఫలితంగా, ఓటు హక్కుకు సంబంధించిన నిర్ణయం స్థానికంగా ఉండే అధికారులు తీసుకోవచ్చునంటూ తీర్పు వచ్చింది.

• 

ఓ అనూహ్యమైన విజయంతో ఇండియాకు తిరిగి వచ్చిన మిథన్‌, అక్కడితో తృప్తిపడిపోలేదు. మరిన్ని హక్కుల కోసం పోరాడేందుకు, న్యాయవాదంలో పట్టా తీసుకున్నారు. దేశంలోనే తొలి మహిలా బారిస్టర్‌ గా, బాంబే హైకోర్టులో న్యాయవాదిగా అడుగుపెట్టిన మొదటి స్త్రీగా చరిత్ర సృష్టించారు. తను చేరుకున్న చోటు, ఆడవారికి అంత అనువైనది కాదని తెలుసు. చుట్టూ అంతా మగవారు, ఆడది కోర్టులో అడుగుపెట్టడమే తప్పుగా భావించే సమాజం, ఎటు చూసినా నేరాలు… వీటన్నింటిని మధ్యా నిలచి గెలిచింది మిథన్‌. ఓ విజయవంతమైన లాయర్‌ గా గుర్తింపు తెచ్చుకుంది. హక్కులకు సంబంధించిన ఎన్నో కేసులను అద్భుతంగా వాదించింది.

కోర్టులో న్యాయం పక్షాన పోరాడిన మిథన్‌, బయట కూడా ప్రజాసేవ కోసం తపించేవారు. పెరిగిన ఫీజులకు వ్యతిరేకంగా ఉద్యమించడం, ఓ మెడికల్‌ వ్యాన్‌ తీసుకుని చుట్టుపక్కల గ్రామాలకు తిరగడం లాంటి పనులతో మిథన్‌ మరాఠీల మనసులు గెలుచుకున్నారు. ‘ఒక్క మనిషి పోరాడినంత మాత్రాన సమాజం మారిపోతుందా ?’ అనే ప్రశ్నకు జవాబే మిథన్‌ జీవితం. తల్చుకుంటే ప్రతి మనిషీ ఓ వకీల్‌ సాబ్‌ కాగలడన్నడే తన సందేశం.

#vakeelsaab #vakeel #talfb #talradio #talstories #vakilsab

విధిని ఎదిరించినవాడి కథ!

20 ఏళ్ల క్రితం ‘అనుపమ బక్షి’ దంపతులకి బాబు పుట్టగానే మురిసిపోయారు. ముద్దుగా, అమాయకంగా ఉన్న ఈ పిల్లవాడికి ‘ప్రణవ్‌’ అని పేరు పెట్టారు. ఆ పసిపిల్లవాడి ఎదుగుదలని చూసి… వాళ్ల మనసు నిండిపోయేది. కానీ తనకి రెండేళ్లు వచ్చిన తర్వాత, మిగతా పిల్లలతో పోలిస్తే ఎదుగుదలలో ఏదో తేడా కనిపించింది. వైద్యులను సంప్రదించిన అనుపమ భయం నిజమైంది. పిల్లవాడికి ఆటిజమ్‌ అనే సమస్య ఉంది.

ఆటిజం మందులతో తీరేది కాదు, థెరపీలతో మానేది కాదు. జన్యుపరమైన లోపం, ఇన్ఫెక్షన్లు, కాలుష్యం లాంటి సవాలక్ష కారణాల వల్ల ఏర్పడే ఆటిజం… జీవితాంతం ఉండిపోతుంది. అవయవాల కదలిక నుంచి జ్ఞాపకశక్తి వరకు అణువణువునీ శాసిస్తుంది. చికిత్సతో వాళ్ల సొంత పనులు చేసుకోగలిగేలా మాత్రమే చేయగలం. మన దేశంలో ప్రతి వందమంది పిల్లల్లో ఒకరికి సోకే ఆటిజం, ప్రణవ్‌ మీద కూడా ప్రభావం చూపింది. కానీ పవన్‌… దాని ముందు తలవంచలేదు! తన కాళ్ల మీద తను నిలబడే ప్రయత్నం చేసేవాడు. అంతేకాదు! గోల్ఫ్‌, ఫోటోగ్రఫీ లాంటి నైపుణ్యాలని కూడా అందుకున్నాడు.

ఒకరోజు ప్రణవ్‌ టీవీ చూస్తున్నప్పుడు ర్యాంప్‌ మీద నడుస్తున్న మోడల్స్‌ కనిపించారు. అంతే! తనకి ఏదో స్ఫురించింది. ‘అమ్మా నేను కూడా వాళ్లలా మోడల్ అవుతాను’ అని తన నిశ్చయాన్ని చెప్పేశాడు. ఆ తల్లి వారించలేదు. ఎందుకంటే ‘మీరు నమ్మాల్సింది పిల్లవాడి ప్రతిభను, లోకం విధించే పరిమితులను కాదు’ అన్నది తన అభిప్రాయం. అందుకే, ప్రణవ్‌ ను మోడలింగ్‌ శిక్షకుల దగ్గరకు తీసుకువెళ్లింది. వాళ్లు అందుకోగానే అల్లుకుపోయాడు ప్రణవ్‌. మోడలింగ్‌ కెరీర్‌లో నిలదొక్కుకున్నాడు. మన దేశంలో, ఆటిజం ఉన్నా కూడా మోడలింగ్‌ చేస్తున్న తొలి వ్యక్తిగా నిలిచాడు.

ఆటిజం మన చేతిలో లేదు. ఆ మాటకు వస్తే… జీవితంలో చాలా బాధాకరమైన సందర్భాలు మన చేతిలో ఉండవు. కానీ వాటికి లొంగిపోవాలా… ఎదిగే మెట్లుగా మార్చుకోవాలా అన్నది మాత్రం మన చేతిలోనే ఉంది. అందుకు ప్రణవ్‌ బక్షి విజయమే సాక్ష్యం!

#pranavbakshi #worldautismday #autismmodel #talradio #talposts

Introduce Yourself (Example Post)

This is an example post, originally published as part of Blogging University. Enroll in one of our ten programs, and start your blog right.

You’re going to publish a post today. Don’t worry about how your blog looks. Don’t worry if you haven’t given it a name yet, or you’re feeling overwhelmed. Just click the “New Post” button, and tell us why you’re here.

Why do this?

• Because it gives new readers context. What are you about? Why should they read your blog?
• Because it will help you focus your own ideas about your blog and what you’d like to do with it.

The post can be short or long, a personal intro to your life or a bloggy mission statement, a manifesto for the future or a simple outline of your the types of things you hope to publish.

To help you get started, here are a few questions:

• Why are you blogging publicly, rather than keeping a personal journal?
• What topics do you think you’ll write about?
• Who would you love to connect with via your blog?
• If you blog successfully throughout the next year, what would you hope to have accomplished?

You’re not locked into any of this; one of the wonderful things about blogs is how they constantly evolve as we learn, grow, and interact with one another — but it’s good to know where and why you started, and articulating your goals may just give you a few other post ideas.

Can’t think how to get started? Just write the first thing that pops into your head. Anne Lamott, author of a book on writing we love, says that you need to give yourself permission to write a “crappy first draft”. Anne makes a great point — just start writing, and worry about editing it later.

When you’re ready to publish, give your post three to five tags that describe your blog’s focus — writing, photography, fiction, parenting, food, cars, movies, sports, whatever. These tags will help others who care about your topics find you in the Reader. Make sure one of the tags is “zerotohero,” so other new bloggers can find you, too.